من النهاردة مش حتشيلي هم التلاجة لو ضيفة فتحتها فجأة (حصري وبالصور)

ازيكم يا بناتيت
مرة تانية نتجمع ان شاء الله في فكرة جديدة من افكار التنظيم
وقررت ان شاء الله اني اعملهم في سلسلة:
"بيتي دايماً مشرفني ورافع راسي"

انا عارفة طبعاً انه لا يعلى عليكم في الشطارة

بس اديني باقولكم خبرتي المتواضعة

لازم كل واحدة فينا تبقى مؤمنة تماماً ان مشكلتنا مش في النضافة
انا عارفة ان كله بينضف

المشكلة اللي بتقابلنا دايماً هي الكراكيب والحاجات الكتتيييييييييرة اللي بنحب نحتفظ بيها
رغم ان ممكن يعدي سنين من غير ما نستخدم الحاجات دي

وده طبعاً بيأثر على نفسيتنا اوي

حاجة كمان
كام مرة زرتي فيها حد وخدتي انطباع معين ؟
هل انطباعك الاول بيتغير ؟
طب سألتي نفسك الناس انطباعاتها ايه عنك وعن بيتك ؟؟

هي دي بقى الفكرة اللي انا شغالة عليها من فترة
التنظيم
الترتيب
التخلص من الكراكيب

مش التنضيف زي ما اتفقنا لأنه حاجة أساسية

طيب النهاردة ان شاء الله حنتكلم عن التلاجة

بترتبي تلاجتك وتنظميها ؟؟
ولا هي عبارة عن دولاب بترمي فيه الاكل وتنضفيه من وقت للتاني؟؟



لازم نتفق على اساسيات الاول

1- لازم تنضيف التلاجة يتم على فترات متقاربة
بس ده مش معناه ان لو حاجة اتدلقت او عملت بقعة تسيبيها
عموماً اي حاجة نضفيها اول بأول عشان تحافظي على اجهزتك
وافتكري ان دي نعمة غيرك مش لاقيها

2- حطي في التلاجة فحم دايما عشان يمتص اي ريحة تظهر
بالذات ان في اصناف ريحتها " بتكرف " على باقي الأصناف

3- مفيش ابداً حاجة تتحط مكشوفة
لأنها ببساطة ريحتها وطعمها حيغير وتترمي
وممكن تبوظ حاجات تانية جنبها

4- اوعي تبيتي اكل في حلل في التلاجة
شكله مش عاطفي بالمرة
غير انه مع الوقت بيبوظ ادوات المطبخ

5- لازم يكون عندك علب تلاجة
طبعاً الزجاج او البيركس هما الاحسن
بس مشكلتهم في الكسر
ممكن لو تحبي تجيبي علب بلاستيك نوع نضيف واستخدميها

ندخل في المفيد

ايه العدة اللي حنستخدمها ؟؟




1- بخاخة فيها مية وديتول واي منظف بيريحك

2- فوط او قماش للتنضيف

3- مجموعة من السلال baskets

4- مفارش تلاجة، ودول اشكالهم كتير وسعرهم معقول اوي

طلعي كل حاجة ع الرخامة او ترابيزة جنبك
اغسلي كل الارفف وسيبيها تنشف
افرشي المفارش بشكل مرتب



وابدأي فرز الاكل اللي في التلاجة
الفاكهة والخضار اغسليهم كويس وحطيهم في علب مناسبة بالشكل ده



او ممكن في سلال حلوة كده





بالنسبة للأجبان واللانشون والحاجات اللي بتستخميها يومياً للسندويتشات مثلاً
برضه حطيهم في سبت او سلة واحة
حتسهل حركتك وتسعفك في الوقت
وكمان حتساعدك في ترتيب التلاجة بدل ما كل طبق يكون في حته




المخللات والزيتون تفضيهم على طول في علب بلاستيك
ولو انتي بتشيلي مثلا بهارات صحيحة او مكسرات في التلاجة
يبقى لازم تحطيهم في برطمانات زجاجية شفافة
او تجمعي الاكياس كلها في box واحد محكم الغلق




ولو خضار من اللي بيبوظ بسرعة حطيه نضيف وناشف في العلبة وكمان حطي تحته مناديل مطبخ




وبالنسبة للفريزر
حاولي دايماً الحاجة تكون مبططة او في اصغر مساحة ليها
يعني مثلاً السوائل انا باحطها في علبة مستطيلة ولما تجمد انقلها في اكياس بلاستيك
وبكده بتاخد مساحة اقل
وباقي الحاجات اللي سهل التحكم فيها افرديها بالشكل ده



وفي فكرة كمان لقيتها في منتدى اجنبي
انك تستخدمي الفولدرز بتاعت حفظ الورق عشان ترتبي الفريزر

يعني اللحوم في واحد
والخضار المجمد في واحد
والعيش مثلاً او البطاطس في واحد




استمتعي معايا بالصور الحلوة دي لتلاجتك بعد الموضوع ده ان شاء الله








وعلى فكرة السلال دي في منها مقاسات كتيرة
واسعارها بتبدأ من 2ونص
وحتلاقيها في كذا مكان بسهولة

يلا بقى وروني الهمة
ومش مطلوب منكم غير صورة واحدة بس للشكل النهائي لتلاجتك بعد النيو لوك