الأدرااااااااااااااااااااج
وما أدراكم ما الأدراج
حنتكلم عن أدراج اوضة النوم النهاردة ان شاء الله
لأن اوضة النوم دي بتعكس انتي ملكة ولا ست عادية
وكمان بتعتبر جزء من نظافتك الشخصية
لو حنتكلم عن تنظيم أدراج غرفة النوم
لازم نحدد ايه العناصر الموجودة في الاوضة
والمساحات الممكنة للتخزين
وكام درج؟ وكل درج يتحط فيه ايه بالضبط؟
عشان تعرفي حتبدأ بايه وازاي
التنظيم بيبدأ من جوة دماغك
يعني لازم تخططي حتعملي ايه
وتحطي ايه فين
ولازم بأقل تكاليف ممكنة
مش عايزين نغرم فلوس في غير محلها
يعني مثلاً انا في اوضتي عندي دولاب (جواه درجين)
و2 كومودينو (كل واحد فيه 3 أدراج)
والتسريحة (فيها 4 أدراج) ناحية فيها 3 ادراج والتانية درج وتحته ضرفة
والشوفنيرة : عريضة مش طويلة طول ( ودي حطاها بره الاوضة في الطرقة) (درج واحد وضرفة كبيرة ببابين)
يعني المجموع 13 درج
نبدأ نقول الترتيب بتاعهم
الكومودينو اللي جنبي متقسم كالتالي:
1- اول درج مسمياه درج الطوارئ ولوازم قبل النوم
يعني لبان مثلاً، برفان، لوشن للجسم، فازلين عليه دم غزال بحطه على كعب رجلي قبل ما انام، الفوط الشخصية الصغيرة ، معطر فم
2- تاني درج: باحط فيه البانتيهات بتاعتي ودي مش بكعورها وخلاص لأ طبعاً
باطبقهم
بجيب العلب اللي بيكون فيها الأحذية لما بنشتريها جديد
زي بتاعت club aldo البمبى أكيد عارفينها
وطبعاً بآخد كل العلب بتاعت اخواتي وهما بيستغربوا باعمل بيها ايه
3- تالت درج: باحط فيه البراهات بتاعتي
الكومدينو التاني وده بتاع جوزي
4- الدرج الاول باحطله فيه شاحن الموبايل ، الساعة، المحفظة، وأي مستلزمات صغيرة تخصه
5- الدرج التاني باحط فيه الفانلات بتاعته
وممكن حد يسألني ازاي بيكفي
اقولكم
انا باطبق الفانلة نصين بالطول وبعدين الفها رول
وبكده الدرج بيشيل كتييييير
6- الدرج الاخير باحط فيه البوكسرات بتاعته
ودي باطبقها 3 بالطول
وبرضه الفها رول
وبالطريقة دي باوفر مكانهم في الدولاب
ومش باسمح ان الادراج تتكركب بحاجات ملهاش لازمة
بالنسبة للتسريحة
7- اول درج فيها باحط فيه كريمات الشعر والفرش والأمشاط والسيروم
(كل ما يتعلق بتسريح الشعر ما عدا التوك والبنس)
8- تاني درج في التسريحة باحط في نصه التوك بتاعتي بأنواعها
وفي النص التاني اكياس الشرابات الجديدة
9- الدرج الأخير ع الشمال باحط فيه أجهزة الشعر
زي السيشوار والبيبي ليس والرولو بأنواعه
10- الدرج الأول ع اليمين باحط فيه شرابات زوجي
وطبعاً مترتبين في بوكس
يتبقى الدرجين بتوع الدولاب والشوفنيرة
بالنسبة لدرجين الدولاب انا باحط فيهم اللانجيري بتاعي
القمصان البيبي دول والبانتيهات والبراهات اللي مش بتتلبس في الخروج العادي
أما درج الشوفنيرة
فده انا حاطة فيه الفولدر بتاع الكتالوجات وأوراق الأجهزة
وكام بوكس كده فيهم مسامير، بطاريات حجارة، مفكات وعدد
وهكذا
أما باقي حاجتي من كريمات وبرفانات ومكياج فأنا حاطاها جوه الدولاب
طيب ازاي كده؟؟
الضرفة اللي في النص كانت متقسمة 3 بس
وكل واحدة فيهم ارتفاعها كبير اوي (حوالي 55 او 60 سم)
وطبعاً اصريت قبل الفرش والفرح اننا نجيب النجار ويعملهم 5 ضرف
ارتفاعهم اقل (حوالي 35 سم)
لكن بيشيلوا حاجات اكتر وفرقوا معايا جداً
لأني بابعد حاجات المهمة والغالية من الأولاد
وكمان مش باحب منظر التسريحة اللي عليها حاجات كتير
انا تسريحتي رخام
وباحط عليها مفرش شيك وعليه شمعدان مدهب
ولما باحب اغير باحط فازة فيها ورد لايق مع الوان ورق الحائط
او كام برواز فيهم صور بتاعتنا
وما تنسيش دايماً تعطري سريرك واوضتك
وخلي المعطر بتاعهم غير اي معطر بتستخدميه في البيت
خلي اوضتك مملكتك ..مكان مميز في كل شيء
يلا احكولي انتو بتحطو ايه في الأدراج
ولو عجبتكم افكاري
شرفوني في باقي موضوعاتي
ليست هناك تعليقات:
إرسال تعليق