الخميس، 28 نوفمبر 2013

شوفي شطارتي في تجديد شكل الموبيليا بتاعتي .. طريقة تدهيب الاويما





النهاردة ان شاء الله حنشوف جانب جديد من الشطارة للست اللهلوبة
وتكملة لسلسلة " بيتي دايماً مرايتي "

نبدأ من الاول
انا متجوزة بقالي 7 سنين ونص
والموبيليا بتاعتي ما بدلتش او غيرت حاجة فيها
بس الحمد لله محافظة عليها باستمرار

ومن فترة كده جاتلي جنونة " زهقت وعايزة اغير العفش"
بس الحمد لله ما كانش ينفع عشان ورانا التزامات كتيرة
وطبعاً كأي ست مصرية اروبة قعدت افكر وادور واشوف فيديوهات
عن طريقة تدهيب الموبيلياونزلت عند الراجل بتاع الدهانات والمون
واللي وصلتله ان في طريقتين

1- انك تجيبي لون دهبي ايطالي
وده علبة معقولة حوالي نص كيلو
وبتكون من 30 لـ 40 جنيه
ودي جاهزة للاستخدام على طول

2- انك تجيبي علبة ورنيش خشب ودي كانت في حدود 10 او 12 جنيه
وتمن كيلو بودرة دهب وده كلفني 15 جنيه ولسه باقي تلات ارباعه تقريباً
ودي بتخلطي شوية ورنيش بشوية بودرة بالنظر كده تقريباً

والطريقتين بتنفذيهم باستخدام فرش رسم بتجيبيها من عنده
انا جبت واحدة رفيعة خالص وواحدة اكبر شوية للمساحات العريض

وطبعاً شمرت دراعي واتكلت على ربنا
واتشعبطت ع السلم ومعايا العدة

نسيت اقولكم اني استخدمت الطريقة التانية

وبدأت جربت في النيش
والصراحة ذهلت من النتيجة


وانا بقى كنت حاموت من الفرحة بشكل النيش الجديد

اتفرجوا ع الصور
وقولولي رأيكم


















طبعاً هي ممكن تاخد ساعتين زمن وتخلص
على حسب سرعتك في الشغل
بس طبعاً حوالي تشتغلي بنضافة
وتسمي الله في الاول
وحتلاقي الموضوع سهل جداً

وانا كمان ما عملتش كل الاويما اللي في النيش
بقيت احاول اعملها بشكل زي الجاهزة
ولو بعد ما خلصتي لقيتي حتة لونها خفيف
عيدي عليها تاني بس بعد ما تنشف

والحمد لله كل اللي يشوف النيش مايصدقش اني انا اللي عامله مش صنايعي

ولو ركزتوا في الصور حتلاقوا فيه ورق حائط
ده انا مركباه بنفسي
وحاقولكم عليه قريب باذن الله

واستنوني كمان في تجديدي لاوضة النوم
وطريقة لزق ورق الحائط


الأربعاء، 27 نوفمبر 2013

شوفي طريقتي المميزة في تطبيق ملاياتي .. حاجة شيك اوي



موضوعي النهاردة ان شاء الله حيكون حصري جداً ومن دولابي رأساً اليكم

وحنكمل فيه باذن الله سلسلة " بيتي دايماً مرايتي "
اللي بدأناها مع بعض

وطبعاً جاتلي أسئلة كتير عن طريقة حلوة لتطبيق الملايات

فقررت اني اصورلكم طريقتي الشخصية في تطبيقهم
يعني مش صور متجمعة من النت وخلاص

نبدأ بسم الله

طريقة تطبيق الملاية نفسها
1- حتجيبي الملاية وتطبيقها نصين بالطول
يعني الجنبين اللي فيهم رسمة او تطريز يكونوا على بعض

2- تطبقيهم نصين تاني بالعرض
وبرضه التطريز او الجناب لسه على بعض
وحتلاقيها بقت زي مربع كبير


3- حتطبقيهم نصين تاني
وزي ما قلنا الجناب على بعض
وحتلاقي الملاية بقت مستطيل عريض شوية


4- وحنرجع نكرر نفس الموضوع تاني
وحتلاقي شكلها بقى مستطيل رفيع



وطبعاً حتلاقي في حتت مش مظبوطة
مش مشكلة
خليها بس لفوق بالشكل ده
وحتداراى بعد التطبيق


5- حتطبقي المستطيل الأخير ده
تلت وتلتين
يعني كأنه 3 مستطيلات
واحد منهم حييجي فوق التاني



وحنستنى دلوقتي عشان نحط الخداديات جواها
 
طريقة تطبيق الخدادية الصغيرة

1- نحطها مفرودة ع السرير
او حتي تفرديها على ايدك

شوفي طريقتي المميزة في تطبيق ملاياتي  .. حاجة شيك اوي

2- طبقيهم نصين بالطول
شوفي طريقتي المميزة في تطبيق ملاياتي  .. حاجة شيك اوي

3- وبرضه نطبق تلت وتلتين
بالشكل ده
شوفي طريقتي المميزة في تطبيق ملاياتي  .. حاجة شيك اوي

4- وده شكلها النهائي
شوفي طريقتي المميزة في تطبيق ملاياتي  .. حاجة شيك اوي

طريقة تطبيق كيس المخدة الطويل

1- طبقيه نصين بالعرض
شوفي طريقتي المميزة في تطبيق ملاياتي  .. حاجة شيك اوي

2- ونطبقين نصين بالطول المرة دي
شوفي طريقتي المميزة في تطبيق ملاياتي  .. حاجة شيك اوي

3- نعمل دلوقتي موضوع تلت وتلتين بالشكل ده
شوفي طريقتي المميزة في تطبيق ملاياتي  .. حاجة شيك اوي

وده شكله النهائي
شوفي طريقتي المميزة في تطبيق ملاياتي  .. حاجة شيك اوي

وده شكل الخداديات فوق بعض
شوفي طريقتي المميزة في تطبيق ملاياتي  .. حاجة شيك اوي

ونرجع بقى للملاية نفسها دلوقتي
ونحط فوقها المخدات بالشكل ده
شوفي طريقتي المميزة في تطبيق ملاياتي  .. حاجة شيك اوي

وطبقي التلت الأخير ده فوق التلتين اللي عليهم المخدات
شوفي طريقتي المميزة في تطبيق ملاياتي  .. حاجة شيك اوي

بصي شكل الملاية شيك ازاي
شوفي طريقتي المميزة في تطبيق ملاياتي  .. حاجة شيك اوي

وكمان ميزتها ان الملاية جواها المخدات بتاعتها
ومش بيعملوا زحمة في الدولاب

انا بقى برصهم فوق بعض كده
واشيلهم في الشوفنيرة
شوفي طريقتي المميزة في تطبيق ملاياتي  .. حاجة شيك اوي

بس طبعاً بارتبهم حسب المقاس
يعني الاعرض شوية باخليه من تحت

وعلى فكرة الموضوع مش صعب زي ما حد فيكم ممكن يفتكر
هي بس اول كام مرة وبعدين حتلاقي نفسك بتخلصيها في ثواني

وانا كمان مش باعملها ع السرير كده
انا باعملها وانا واقفة لأن ايدي خدت ع الطريقة دي

يارب تكون طريقتي واضحة وعجبتكم

السبت، 23 نوفمبر 2013

مع ست لهلوبة .. نظمي أدراجك بشياكة وكمان ببلاش

النهاردة ان شاء الرحمن حنكمل سلسلة
" بيتي وأولادي دايماً مرايتي"
وأفكار التنظيم اللي بدأناها مع بعض من فترة

واتفقنا في المواضيع دي ان التنظيم لا يقل اهمية عن التنضيف
لأنه بيخلي التنضيف اسهل وكمان بيظهر مجهودك

 

 وبما اننا دايماً بندور على افكار جديدة لتنظيم البيت واستغلال كل مساحة ممكنة بشكل سليم عشان نخلص من شبح الكركبة

فعشان كده جبتلكم فكرة "طوييييييلة" عن تنظيم الادراج
 

الفكرة ببساطة ان كلنا بنضف ونرتب الادراج وترجع تتبهدل من تاني وننضف تاني وتتبهدل تاني
وتحسي انك في دوامة طول الوقت

فعشان كده حنرتبهم من غير ما ندفع ولامليم
دايخةدايخة
إزاي يعني؟؟؟؟
يعني حتجيبي كل العلب الكرتون اللي عندك في البيت
وكل ما تجيبي حاجة تدخلي الكرتونة بتاعتها في الخدمة على طول

وزي الشاطرة تجيبي ورق هدايا، او جلاد، او استيكر بتاع الزجاج

ولزقي وظبطي وعيشي حياتك

والصورة اهي: شارحة نفسها
وعموماً اي استفسار
انا تحت امركم

مع omjudy نظمي أدراجك بشياكة وكمان ببلاش

الجمعة، 22 نوفمبر 2013

ايه اكتر حاجة بتلفت انتباهي لما بازور واحدة صاحبتي او جارتي او قريبتي في بيتها؟؟؟

لقاء جديد يجمعنا
بحب وود وامل ان اللي جاي ان شاء الله احسن

وبعد انتهاء فترة الصيف اللي قضيت معظمها في البحث عن افكار جديدة لتنظيم البيت
واستغلال كل مساحة ممكنة بشكل سليم عشان اخلص من شبح الكركبة

قلت لنفسي الصراحة الفكرة دي بقالها فترة بتزن في دماغي

ولهذا....
قررت اني اقول اللي عندي
واسمع افكاركم
لأن الموضوع خطير ولا يحتمل التأجيل

بس الاول

اكتر حاجة بتلفت انتباهي لما بزور واحدة في بيتها هي...  ؟؟؟ كلمتين من omjudy

الفكرة ببساطة ان كلنا بنضف والدنيا تتبهدل وننضف تاني وتتبهدل تاني
وتحسي انك في دوامة طول الوقت

وبنتكلم كتير اوي ونسأل بعض اكتر
بس في واحدة فكرت تسأل نفسها
ايه اكتر حاجة بتلفت انتباهي لما بازور واحدة صاحبتي او جارتي او قريبتي في بيتها؟؟

ومش مطلوب تفصصي البيت بعنيكي ولا تكشفي ستر حد لا سمح الله
هي بس شوية افكار نساعد بعض بيها
اننا نبقى مكان ضيوفنا

حابدأ بنفسي..
انا لما بازور حد سواء اعرفه قبل كده او زيارة لأول مرة
 

اول حاجة بتلفت انتباهي هي مدخل البيت
هل باب الشقة نضيف ولا لأ ؟؟
هل الباسكت محطوط قدام الباب ؟؟ طيب عامل ريحة ؟؟ القطط قلبته ؟؟
هل اهل البيت بيحطوا ((عفواً)) الشباشب والأحذية برة ؟؟
هل السلم والمدخل نضاف ولا لأ ؟؟

وكمان اكتر حاجة بتشدني هي ريحة البيت
هل ريحة البيت متهوية ولا مكممة ؟؟
ريحة البيت طبيخ وتوم وبصل ولا ريحته بخور ومعطرات حلوة ؟؟

وكمان ممكن تيجي تكلمي جارتك من ع الباب مثلاً
واولادها يطلعوا يقفوا ع الباب
بصراحة بيلفت انتباهي اوي مظهرهم العام
يعني ممكن ولد يكون لابس حاجة شكلها قديم
عادي يعني بس نضيفة وشعره متسرح ووشه مغسول
وممكن بنت تبقى لابسة بيجامة احدث موديل
بس مش نضيفة
بس شعرها منكوش
بس وشها مش مغسول بضمير

ولو معزومة على غدا او عشا
بيفرق معايا اوي شكل المطبخ
طبعاً لو الظروف حكمت اني ادخله
يعني مش بادخل من باب التطفل لا سمح الله
البوتاجاز مثلاً
لمعة الحوض
طبيعي بيكون في كركبة عشان العزومة
بس مؤشرات النضافة غير

تصدقوا كمان بيفرق معايا ريحة فوطة الضيوف وسجادة الصلاة
يعني انا مثلاً في بيتي باخلى فوط مخصوصة للضيوف
وعندي بخاخة فيها مية وداوني
ودي بتنجدني دايماً لو حد جه فجأة



ملحوظة مهمة يا بنات

انا مش اقصد خالص اننا ننتقد الناس او نقولهم بشكل محرج
انا اقصد اللي انتي بتحسيه بينك وبين نفسك
ولا اقصد انك تبصي في كل حتة وتحرجي صاحبة البيت
ولا انك ما تعذريهاش

الفكرة اني باكون دايماً حريصة ان الناس تشوف بيتي في احسن صورة
وعشان كده باحاول افكر بنظرتهم لي مش اكتر
وهدفي اننا ندي الاولوية للحاجة اللي الضيوف بتاخد بالها منها

المطلوب منكم ببساطة
كل واحدة تحكي لنا
ايه اكتر حاجة بتلفت انتباهك ؟؟
عشان نستفيد من بعض
ونظهر دايماً في احسن صورة مشرفة

الاثنين، 18 نوفمبر 2013

هاتي دستة مشابك وتعالي معايا ننظم شوية


حبايبي الحلوين
اللي بالتنظيم والترتيب مهتمين

لقاء جديد يجمعنا بكل حب وود
ودايما ان شاء الله يكون معايا ليكم افكار جديدة متميزة وحصرية

وده طبعاً في سلسلتنا
((بيتي وأولادي دايماً مرايتي ))


وفكرة النهاردة بسيطة ورخيصة كالعادة

احنا متفقين اننا حنظم البيت ونرتبه
بس من غير ما نبوظ الميزانية

بس الاول


من omjudy هاتي دستة مشابك وتعالي معايا ننظم شوية

عندك مشابك؟؟؟
ايوه طبعاً عندي
بتعملي بيهم ايه؟؟؟
انتي سخنة ولا حاجة ؟؟؟

لا يا حبايبي انا زي الفل الحمد لله
انتو اللي حتحسوا بشحنة حماس رهيبة بعد الموضوع ده بإذن الله

 
موضوع النهاردة ان شاء الله حيكون هدية ليكم


وكل اللي حتحتاجيه
دستة مشابك بلاستيك او خشب + غرا ابيض

ولو حبة تدلعي نفسك شوية
حتجيبي معاهم شوية جليتر باللون اللي يعجبك
وتدهني الغرا من ناحية ع المشبك
وتحطي عليها الجليتر

وحتلاقيها بالشكل المدلع ده

من omjudy هاتي دستة مشابك وتعالي معايا ننظم شوية

وكل اللي حتعمليه انك حتدهني ناحية بالغرا
وتعلقيها في المكان اللي تحبيها
وسيبيها تنشف كويس
وكل اللي عليكي
تدوسي ع المشبك وتعلقي اللي انتي عايزاه

وبالنسبة للاستخدامات بتاعتهم فهي كتيرة اوي


1- لو عندك طقم من قطعتين
ودايما واحدة منهم تتوه في وسط الدولاب
من omjudy هاتي دستة مشابك وتعالي معايا ننظم شوية


2- او لتجهيز لبس الاسبوع لأولادك
عشان توفري وقتك
وكمان تساعديهم في التعود على تنسيق الالوان مع بعض
من omjudy هاتي دستة مشابك وتعالي معايا ننظم شوية


3- عشان ترتبي الحاجات اللي بتحيرك في مكان ليها
زي حزام.. كوفية ... جوانتي ... كاب
من omjudy هاتي دستة مشابك وتعالي معايا ننظم شوية


4- وممكن تحطي واحد في شنطتك
وتلفي عليه سماعات الموبيل
او الشاحن بتاعك
من omjudy هاتي دستة مشابك وتعالي معايا ننظم شوية

5- دي الصراحة جديدة
لو مش عندك مكان تعلقي عليه الخضرة اللي محتاجة تنشفيها
زي النعناع مثلاً
من omjudy هاتي دستة مشابك وتعالي معايا ننظم شوية


6- ممكن جوه ضرف المطبخ
تعيشي حياتك في تعليق الحاجات الصغيرة
من omjudy هاتي دستة مشابك وتعالي معايا ننظم شوية


7- وعشان تتجنبي موضوع الاسلاك الكتيرة للكمبيوتر
من omjudy هاتي دستة مشابك وتعالي معايا ننظم شوية


8- وعشان تتخلصي من فوضى رسومات الاطفال
او حتى تنظمي الكتب بتاعتهم
هاتي حبل واربطيه فوق السرير او المكتب
وعلقي عليه حاجاتهم
من omjudy هاتي دستة مشابك وتعالي معايا ننظم شوية


9- ولو مش لاقية مكان للمفاتيح
مش حتحتاجي غير مشبكين
من omjudy هاتي دستة مشابك وتعالي معايا ننظم شوية

10- وعشان الشرابات اللي بتلاقيها فردة واحدة بعد الغسيل
ولما تلاقي التانية تكون الاولى ضاعت
هاتي خشبة او كرتونة
والزقي عليها المشابك ... وبس
من omjudy هاتي دستة مشابك وتعالي معايا ننظم شوية


11- وممكن تستخدميها لتنظيم اطقم الملايات مع بعض
بس الصراحة انا استغربت الفكرة
من omjudy هاتي دستة مشابك وتعالي معايا ننظم شوية

وفاكرين بقى الصورة دي من موضوع العلاّقات
من omjudy هاتي دستة مشابك وتعالي معايا ننظم شوية

عجبتكم اوي .. صح؟؟
ممكن برضه تنفذيها باستخدام المشابك
من omjudy هاتي دستة مشابك وتعالي معايا ننظم شوية

من omjudy هاتي دستة مشابك وتعالي معايا ننظم شوية

وتعلقي عليها بديهات او غيارات داخلية او بندانات


وكمان فكرتين ع الماشي من المشابك القديمة


- ممكن تعملي بيهم حامل للحاجات السخنة
وتلونيه بأي دهان عندك
من omjudy هاتي دستة مشابك وتعالي معايا ننظم شوية

- او من شماعة وقماش تعملي كيس لحفظ المشابك
من omjudy هاتي دستة مشابك وتعالي معايا ننظم شوية

يارب تكون الافكار عجبتكم
وكل واحدة تقولي ايه اكتر واحدة عجبتك
وايه اللي حتنفذيه منهم


ولو عندكم اي استفسار
انا تحت امركم

وكلمة صغيرة للأمانة
الصور دي من مواقع اجنبية كتيرة
يعني مش من تصويري الخاص
عشان في منكم اللي بيسألني عليها
وفاكرين انها تخصني
بس كان لازم اوضحلكم
اني ترجمت الكلام وشرحته وجمعته بس
لكن تنفيذي ليها مش باصوره
لكن حانزلكم الشكل النهائي اللي عملته في بيتي بالفعل في موضوع مجمع بإذن الله في نهاية السلسلة دي

AddThis