هاتي دستة مشابك وتعالي معايا ننظم شوية

حبايبي الحلوين
اللي بالتنظيم والترتيب مهتمين

لقاء جديد يجمعنا بكل حب وود
ودايما ان شاء الله يكون معايا ليكم افكار جديدة متميزة وحصرية

وده طبعاً في سلسلتنا
((بيتي وأولادي دايماً مرايتي ))


وفكرة النهاردة بسيطة ورخيصة كالعادة
احنا متفقين اننا حنظم البيت ونرتبه
بس من غير ما نبوظ الميزانية

بس الاول




عندك مشابك؟؟؟
ايوه طبعاً عندي
بتعملي بيهم ايه؟؟؟
انتي سخنة ولا حاجة ؟؟؟

لا يا حبايبي انا زي الفل الحمد لله
انتو اللي حتحسوا بشحنة حماس رهيبة بعد الموضوع ده بإذن الله

 
موضوع النهاردة ان شاء الله حيكون هدية ليكم

وكل اللي حتحتاجيه
دستة مشابك بلاستيك او خشب + غرا ابيض

ولو حبة تدلعي نفسك شوية
حتجيبي معاهم شوية جليتر باللون اللي يعجبك
وتدهني الغرا من ناحية ع المشبك
وتحطي عليها الجليتر

وحتلاقيها بالشكل المدلع ده



وكل اللي حتعمليه انك حتدهني ناحية بالغرا
وتعلقيها في المكان اللي تحبيها
وسيبيها تنشف كويس
وكل اللي عليكي
تدوسي ع المشبك وتعلقي اللي انتي عايزاه

وبالنسبة للاستخدامات بتاعتهم فهي كتيرة اوي

1- لو عندك طقم من قطعتين
ودايما واحدة منهم تتوه في وسط الدولاب



2- او لتجهيز لبس الاسبوع لأولادك
عشان توفري وقتك
وكمان تساعديهم في التعود على تنسيق الالوان مع بعض



3- عشان ترتبي الحاجات اللي بتحيرك في مكان ليها
زي حزام.. كوفية ... جوانتي ... كاب



4- وممكن تحطي واحد في شنطتك
وتلفي عليه سماعات الموبيل
او الشاحن بتاعك


5- دي الصراحة جديدة
لو مش عندك مكان تعلقي عليه الخضرة اللي محتاجة تنشفيها
زي النعناع مثلاً



6- ممكن جوه ضرف المطبخ
تعيشي حياتك في تعليق الحاجات الصغيرة



7- وعشان تتجنبي موضوع الاسلاك الكتيرة للكمبيوتر



8- وعشان تتخلصي من فوضى رسومات الاطفال
او حتى تنظمي الكتب بتاعتهم
هاتي حبل واربطيه فوق السرير او المكتب
وعلقي عليه حاجاتهم



9- ولو مش لاقية مكان للمفاتيح
مش حتحتاجي غير مشبكين


10- وعشان الشرابات اللي بتلاقيها فردة واحدة بعد الغسيل
ولما تلاقي التانية تكون الاولى ضاعت
هاتي خشبة او كرتونة
والزقي عليها المشابك ... وبس



11- وممكن تستخدميها لتنظيم اطقم الملايات مع بعض
بس الصراحة انا استغربت الفكرة


وفاكرين بقى الصورة دي من موضوع العلاّقات


عجبتكم اوي .. صح؟؟
ممكن برضه تنفذيها باستخدام المشابك




وتعلقي عليها بديهات او غيارات داخلية او بندانات


وكمان فكرتين ع الماشي من المشابك القديمة

- ممكن تعملي بيهم حامل للحاجات السخنة
وتلونيه بأي دهان عندك


- او من شماعة وقماش تعملي كيس لحفظ المشابك


يارب تكون الافكار عجبتكم
وكل واحدة تقولي ايه اكتر واحدة عجبتك
وايه اللي حتنفذيه منهم


ولو عندكم اي استفسار
انا تحت امركم

وكلمة صغيرة للأمانة
الصور دي من مواقع اجنبية كتيرة
يعني مش من تصويري الخاص
عشان في منكم اللي بيسألني عليها
وفاكرين انها تخصني
بس كان لازم اوضحلكم
اني ترجمت الكلام وشرحته وجمعته بس
لكن تنفيذي ليها مش باصوره
لكن حانزلكم الشكل النهائي اللي عملته في بيتي بالفعل في موضوع مجمع بإذن الله في نهاية السلسلة دي